✨ Сэтгэл заслын жинхэнэ үнэ цэнэ — Та энд ирж, өөртөө цаг гарган зөвлөгөө авах гэж шийдсэн нь өөрөө маш том алхам юм. Энэ нь таны өөрчлөлтийн замналын эхлэл болж чадна.

Заримдаа үйлчлүүлэгчид сэтгэл зүйчээс өөрийн хүссэн үгээ сонсож, баталгаажуулалт авах хүлээлттэй ирдэг. Жишээ нь:“Чи багадаа хайр мэдрээгүй болохоор амьдрал чинь ийм байна”, эсвэл “Чи маш мундаг, удахгүй бүх зүйл сайхан болно” гэх мэт. Үүнийг сонсохгүй бол “энэ сэтгэл зүйч үр дүнгүй” гэж үздэг тохиолдол гардаг. Зарим мэргэжилтэн, шашны төлөөлөгчид ингэж үйлчлүүлэгчийн хүссэн үгийг хэлж, тэднийг тогтоон барих аргыг ашиглах нь бий.

✨ Хүлээлт ба үр дүн — “Би хурдан энэ асуудлаа шийдмээр байна” гэж бодох нь хэвийн. Сэтгэл зүйн шинжлэх ухаан ч үйлчлүүлэгчийн цаг, хөрөнгө, энергийг хэмнэх оновчтой арга замуудыг эрэлхийлсээр байна. Гэхдээ өөрчлөлтөд орж буй хугацаа нь хүний нас, туулсан амьдрал, хүлээлт, сэтгэл зүйн боловсролоос шууд хамаардаг.

Тиймээс уулзалтуудын хооронд өөрийгөө ажиглах, сэтгэл зүйчийн өгсөн даалгаврыг биелүүлэх нь хамгийн чухал. Өөрчлөлтийн 50 хувь нь уулзалтын үеэр, 50 хувь нь таны өдөр тутмын дадал, анхаарал халамж дээр тулгуурладаг.

✨ Гэр бүл, ойр дотныхондоо зөвлөгөө санал болгох тухай — “Нөхрөө, эхнэрээ, найзаа уулзуулъя” гэж хүсэх нь ойлгомжтой. Гэхдээ зөвлөгөө нь тухайн хүний өөрийн шийдвэр байж гэмээ нь үр дүнтэй байдаг. Бусдыг өөрчлөх гэж оролдох нь төөрөгдөл бөгөөд та өөрийгөө өөрчлөх замаар гэр бүл, ажил амьдралдаа ахиц гаргах боломжтой.